Ervin İbragimovnıñ anası prezident Poroşenkoğa muracaat etti

04.10.20169:05

Bağçasarayda qaçırılğan qırımtatar faali, Bütün dünya qırımtatar kongressiniñ İcra şurası azası Ervin İbragimovnıñ anası Lilâ Aliyeva mektüp yazıp, Ukraina prezidenti Petro Poroşenkoğa muracaat etti.

Mektüpte Aliyeva Poroşenkoğa onıñ oğlu Ervin İbragimovnı, bunen beraber, diger qaçırılğan qırımtatarlarnı qıdıruv ve azat etüvi boyunca qoşma tedbirlerni keçirmege rica ete.

Mektüp metini fotoresimini «QırımSOS» cemaat teşebbüsi yolbaşçısı Tamila Taşeva Facebook saifesinde yerleştirdi.

«Pane Prezidente! Büyük qayğı duyğusınen Sizge oğlum ve diger qaçırılğanlarnıñ taqdiri içün muracaat etem ve ümüt etem ki, olarnı qıdırmaq ve azat etmek içün qoşma tedbirler keçirilecektir. Biz, qaçırılğan qırımtatarlarnıñ ana-babaları, eminmiz ki, olarnıñ qabaatı − Ukrainağa sıñırsız sevgisindedir, olarnıñ onıñ kerçek vatanperverleri olğanlarındadır. Ürmetli Petro Alekseyeviç! Ümüt etem ki, yatağından sevgili oğlunı körmek ve quçaqlamaq ümütinen turğan, qayğıdan yer tapalmağan ananıñ, saqat adamnıñ muracaatını red etmezsiñiz», – dep yazdı Lilâ Aliyeva mektüpte.

Avdetniñ bildirgenine binaen, Ervin İbragimovnıñ taqdiri aqqında endi dört ay devamında iç malümat yoq.

Hatırlatamız ki, mayıs 24-te Bağçasarayda qırımtatar milliy areketi faali, Bağçasaray şeer şurasınıñ sabıq deputatı, regional meclis azası, Bütün dünya qırımtatar kongressiniñ İcra şurası azası Ervin İbragimov ğayıp oldı. Onıñ maşnası onıñ yaşağan evi yaqınlarında açıq turğan tapıldı. Ğayıp olğan, babasına aytqan edi ki, 36-cı region 350 sanlı Shkoda Octavia A 6 onı nezaret ete.

Ervin İbragimovnıñ tutulğanını onıñ evi yanındaki tükânda yerleştirilgen video nezaret kameraları qayd etti. Videoda körüne ki, Yol-patrul hızmeti hadimleri urbasındaki belli olmağan şahıslar gençni tutıp, onı beyaz renkli Ford Tranzit avtomobiline oturttı.

Hatırlatamız ki, Bağçasaray faalleri, bunen beraber, qırımtatar faali Ervin İbragimovnıñ soy-sopları ve dostları qıdıruvnı teşkil etti. Ğayıp olğannıñ yaqınları Ervin İbragimov içün 1 million ruble mükâfat bermege azır olğanlarını bildirdi.

İyün 1-de Bağçasaraydaki «Arpat» restoranı yanında qaçırılğan Ervin İbragimovnıñ pasportı ve iş kitabı tapıldı.

Qırım boyunca RF Taqiq komiteti Ervin İbragimovnıñ babası bergen arizağa cevap berdi. Müessisenıñ matbuat hızmetinde bildirdiler ki, Rusiye Federatsiyası Cinaiy kodeksiniñ 126 maddesi 2-ci qısmınıñ «a,v» maddeleri (insannı qaçıruv) boyunca açılğan cinaiy iş taqiq etile. Ervin İbragimovnıñ bütün Rusiyede qıdırıluvı ilân etildi.

İyül 17-de qırımtatar faali Ervin İbragimovnıñ doğğan künü munasebetinen dua keçirildi.

İyül 27-de Kiyevdeki RF elçiligi yanında ğayıp olğan Ervin İbragimovge destek aktsiyası keçirildi.

Hatırlatamız ki, iyül soñunda Qırımnı ziyaret etken frenk deputatlarınen körüşüvde Qırım prokurorı Natalya Poklonskaya ilân etti ki, Ervin İbragimovnı onıñ ğayıp olmasından bir ay keçken soñ sağ kördiler. Onıñ sözlerine binaen, yüz bergen vaqianıñ «cumhuriyet uquq qoruyıcı organlarına nisbeten tecavuz ve negativni doğurmaq içün provokatsiya» olması mümkün.

Фото аватара

Автор: Редакция Avdet

Редакция AVDET