Meclis reisiniñ sabıq muavini, şimdi ise temsil organnıñ azası Remzi İlyasov devlet şurasına saylaylarında Bir Rusiye firqasınıñ Qırım regional bölüginiñ cedveline kirgeni- soñ künlerde eñ çoq muzakere etilgen haberlerden biri oldı.
Ruslan Balbek, Vasfi Abduraimov, Edip Gafarov, Lentun BezaziyeV kibi marginallarnıñ areketleri artıq kimseni ayrette qaldırmasa, İlyasovnıñ soñ adımları qırımtatarlarnıñ büyük qısmını menfiy manada şaşırttı. Remzi bey qırım parlamentniñ vitse spiker vazifesini qabul etkeni beklenilmegen bir qarar oldı, amma onı bu vazifege Milliy Meclis yolladımı, yoqmı, öyle de tam belli degil. Bazıları bu adımlar temsil organnıñ belli bir siyaetidir dep tüşüneler. Amma belli olğanı kibi, İlyasov Bir Rusiye cedvelinde Sergey Aksonov ve Vladimir Konstantinovnen bir sırada em de Milliy Meclis tarafından saylavlarda iştirak etmemek qararı ilân etilgen soñra peyda olması şerefli sayılmaz ebet.
Remzi İlyasovnı parlament komitetiniñ başı vazifesinden boşatqan soñ, er alda canı ağırğan İlyasov raqibi Enver Abduraimovnı ahlâqsızlıq, namussızlıqta qabaatladı. Soñra Milliy Meclis reisi olmaq içün oña 12 rey yetişmedi. Reis muavini vazifesi de oña qısmet olmadı. Bir qaç ay devamında Remzi İlyasovnıñ adı bir yerde añılmasa, qırım vaqiaları yüz bergende, yani vitse spiker vazifesine yer boşanğanda soyadı kene ağızğa alındı, amma o vaqıtta Meclis akimiyetke eki namzetni köstergen edi, olarnıñ arasında İlyasovğa kene de yer tapılmağan edi. Matbuatta İlyasovğa Konstantinovnıñ muavini vazifesi teklif etilecegi aqqında laf yürsetilgen edi, amma İlyasov özü qırımtatarlarnıñ temsil organı buña razı olmağance iç bir adım atmaycağını tasdiqalağan edi. Remzi İlyasovnıñ soñki areketleri ne sebepten yapılğanı cematçılıq içün öyle de sır olıp qalacaqqa oşay: amelge keçirilmegen hayallarmı, akimiyette olmaq arzusımı, şahsiy menfaatlarmı, halqqa hızmetniñ özgün yolumı ve il. , amma olacağı oldı. Keçken sene Meclisniñ reisi olaraq Remzi İlyasov saylanılsaydı, vaqialarnıñ ketişatı nasıl olur edi, aceba?
İlyasovdan ğayrı Bir Rusiye cedvelinde eñ baştan rusiye tarafdarları olğan qırım parlamentniñ prezidum azası Lentun Bezaziyev ve Edip Gafarov da nazmetini köstermekteler. Olarnıñ fikirdeşleri olğan Vasfi Abduraimov, Rinat Şaymardanov, Ruslan Balbek kibi şahıslar cedvelde yoqlar.
Böyle alda aqlımızğa çeşit fikirlerl kelmekte. Şu fikirlerniñ birini qırımtatarlarnıñ lideri Mustafa Cemilev seslendirdi. Onıñ aytqanına köre, akimiyet Meclisni içinden bölmege tırışa, o da olmasa, Meclisni aslında yasaq ete bilirler.
Hatırlatamız ki, Refat Çubarovğa Qırımğa kiriş yasaq etilgen soñ Milliy Meclis akimiyetnen işbirlikni bütünley toqtatmaq ve kimseni namzetke çıqarmamaq qararına keldi. Akimiyetke teklif etilgenlerden, amma aslında Mecliske ait olmağan Milletler komitetiniñ yolbaşçısı Zaur Smirnov qaldı. Amma Zaur bey de İlyasov kibi tüşünip, akimiyetnen bağlarnı qaviyleştirmek, işbirlikte faaliyet köstermekniñ zarurlığında emin.
Amma qırımtatar memurları öz ambitsıyalarını amelge keçirmek, karyelarını qurmaq isteseler, istekleri kerçeşleşmecegi belli. Akimiyette olarğa daima qoltutacaqları şübeli, istegen vazifelerde bulunmaq meselesi de vaqtıncadır. Devlet şurasından olarnı kimse atıp taşlamaycaqlarını tüşüngenler olsa, belli vaqialarğa “uyğun” munasebet köstermegenleri içün birden vazifelerinden boşatılğan bir qaç qırım yolbaşçılarnı hatırlasınlar.
Enver Uzuncı
