Halqımız arasında öyle bir insanlar bar ki, olarnı ayrı bir millet- memurlar milletine ayrımaq mümkün. İlk baqıştan, diger qırımtatarlardan, yani menden de sizden iç farq etmeyler.
Adları, soyadları, halqnı qayğırıp aytılğan lafları, qırımtatar tilinde laf etkenleri olar- vatandaşlarımız olğanını köstere. Amma mezkür “huquqqoruyıcılar”nıñ tercimeiallarını tafsilâtlıca ögrenip, evel köstergen faaliyetlerini bir talil etsek, tek öz menfaatları peşinde yürgenleri añlaşıla. Olar akimiyet deñişkeninen özleri de deñişeler, de portaqal, de mavı, soñra zaten rusiye bayrağı renklerinde qarışıp qalalar. Memurlar er şeyden ziyade öz yerlerini, vazifelerini coymağa qorqalar.
Amma memurlarnı er angi bir siyasiy deñişmeler vaqtında nasıl olsa da idare terkibinde qalmaq istekleri içün qabaatlamayıq barem. Bir de bir insannı onıñ tabiatı içün qabaatlamazsiñ ki. Amma bütün qırımtatar halqı adından söz aytmaq tek Qurultaynıñ haqqı bar. Bu vazifeni öz boyunlarına almağa tırışqan bir qaç memur bunı muhalifet qarşısında nufuzlı körünmek içün yapalar.
Bugünde bugün memurlar kene de öz menfaatları oğrunda ğayret kösterseler de, kene de vatandaşlarınınıñ yardımına işanalar. Bu yolda iç bir şeyden çekinmeyip, eski ammam, eski tas kibi, aynı laflarnı, vadelerni tekrarlay tekrarlay halq adından aytqanlarını kösterip, onıñ kelecegi, abadanlaşuvı içün çalışacaqlarını bildireler. Siyasette de belli mevamları olmağanını da gizlemeyler: ‘Biz bugün Qırımda idare etken akimiyetnen birlikte çalışmaq kerekmiz, Ukrainamı, Rusiye, ya da başqa bir devletmi, farqı yoq,”- dedi böyle memurlardan biri.
Eñ meraqlısı şu ki, memurlar saylavlar devrinde eñ çoq faaliyet kösterler. Bazı unutılğan adlar aynı bu devirde kene özlerini hatırlatalar. Bu saylav savaşında evelden unutılıp qalğan milliy ğayeler, davalar kene ortağa çıqa. Bazıları atta yaşağan yerlerini deñiştirmege azırlar. Misal olaraq, çoq yıllar devamında Geniçesk rayon memuriyetiniñ yolbaşçısı olıp çalışqan Seytumer Nimetullayev Qırımda abul- qubul bir teşkilât qurıp, Devlet şurasına saylavlarına eminliknen adımlamaqta. Aynı zamanda evel yaşağan yerine kir tökip de yetiştirdi. Şu daqqası o devletniñ topraqlarında 1967 senesinden muvafaqiyetli iş adamı olıp, bayağı qazanç elde etkenini unutqandır. Herson vilâyetinde yüksek rutbeli insan olıp, Nimetullayev öz aqqında “ukrainalı qırımtatarı” dep şaqalaşmağa seve edi. Yarın bu emirane qırımtatarı öz milletini unutmaycağına emin olmaq mümkünmi?
Memurlardan biri, Lentun Bezaziyev böyle aytqan edi: “ 50 yaşını keçken bir erkek bugün bir fikirde olıp, yarın onı deñiştirse, eñ azdan ekicınıslı, temelsiz sayılır’.
Seytumer Nimetullayev
1995 senesi- “Çongar” hocalığınıñ yolbaşçısı,
2006-2014 ss.- Geniçesk rayon Şurasınıñ reisi, Herson vilâyeti Geniçesk rayondevletmemuriyetiniñ reisi
2012 s.- qurultaynıñ “Qırım Muhtar Cumhuriyeti Yuqarı Şurası, yerli şuralar deputatları, köy ve şeer başlarınıñ saylavları aqqında” qararını bozğanı içün qırımtatar halqını taqdim etmek haqqından marum qaldırıldı.
2014 senesi fevral ayında Meydandaki vaqialardan soñ Regionlar Firqasınıñ rayon bölüginiñ reis vazifesinden istifağa çıqtı.
Remzi İlyasov
1995-2001 ss. – Qırım Muhtar cumhuriyeti milletler ve sürgün etilgen grajdanlarnıñ işleri boyunca Cumhuriyet komitetinde qırımtatarlarnıñ abadanlaşuvı boyunca idare resi.
2001-2006 ss.- Ukraina halq deputatınıñ yardımcı-mesleatçısı.
2006-2013 ss. – Qırım Muhtar Cumhuriyeti Yuqarı şurası halqara munasebetler ve sürgün etilgen grajdanlar meseleleri boyunca Daimiy Komissiyanıñ reisi.
2006-2010 ss. –Qırım Yuqarı Şurası deputatı
2010 s.- Aqmescit şeer başı namzeti
2010-2014 ss.- “Qurultay-Ruh” fraktsıyası adından Qırım Yuqarı Şurasınıñ deputatı
2014 senesi mayıs ayından- Qırım Cumhuriyeti Devlet Şurasınıñ reis muavini
2012 s., iyül- Qırım Cumhuriyeti Devlet şurasına “bir Rusiye” firqası adından ilk 5 deputat nazmetlerinden biri oldı.
2007-2010 ss.- Ukriana prezidenti yanında qırımtatar halqınıñ temsil Keñeşiniñ kâtibi, soñra azası.
1991-1996, 2001-2007 ss, 2007 şimdige qadar qırımtatar Qurultayınıñ delegatı. Qırımtatar Milliy Meclis terkibine 3 defa saylanıldı.
2001-2013 ss.- Milliy Meclis reisiniñ muavini
Edip Gafarov
1991-1994 ss.- qurucılıq malzemeler kombinatınıñ direktorı
1994-1999 ss.- idarecı muavini, qurucılıq trestniñ idarecisi
1999 s.- QMC milletler ve sürgün etilgen grajdanlarnıñ işleri boyunca Cumhuriyet komitetniñ reis muavini
1999 s., dekabr- 2000 s., iyün- QMC milletler ve sürgün etilgen grajdanlarnıñ işleri boyunca Cumhuriyet komitet reisiniñ vazifelerini eda etken
2000 s., iyün- 2002 mayıs, AMC milletler ve sürgün etilgen grajdanlarnıñ işleri boyunca Cumhuriyet komitetniñ reisi
2002, mayıs- 2005 s.,mayıs- QMC nazirler Şurasınıñ reis muavini
2002-2006 ss.- QMC Yuqarı Şurasınıñ deputatı
2008 s. iyül- QMC suv-hocalıq qurucılığı ve suvarılğan topraq işletüvi boyunca Cumhuriyet komitetiniñ reis muavini
2010-2014 ss.- QMC yuqarı Şurasınıñ Regionlar firqası adından deputatı
2014 senesi 4 aprel ayından — Qırım cumhuriyeti Devlet şurasınıñ milletlerara munasebetleri ve sürgün etilgen grajdanlarnıñ meseleleri boyunca daimiy komissiyanıñ reisi
2014 s., iyül — Qırım Cumhuriyeti Devlet şurasınıñ deputatlar nazmetleri cedveline “Bir Rusiye” firqasın adından kirsetilgen.
2001 senesi- “Qırım MC nam qazanğan qurucı” fahriy unvanına nail oldı
2004 s.- Ukraina Nazirler Kabinetniñ fahriy yarlığı
Lentun Bezaziyev
QC DŞ reisi ve muavinleriniñ hızmet idaresiniñ QCDŞ reis mesletçısı
1990 s.- 1993 s.- QMC milletler ve sürgün etilgen grajdanlarnıñ işleri boyunca Komitetniñ reisi
QMC nazirler şurasınıñ reis muavini
1993-1998 ss.- “Qırım-Rus” şirketiniñ prezidenti
1998-2002 ss.- QMC Nazirler şurasınıñ reis muavini
1998-2002 ss.- QMC Yuqarı Şurasınıñ Ukraina kommunistik firqası tarafından deputatı
2002-2006 ss.- QMC Yuqarı Şurasınıñ “ Blok Yuliyi Timoşenko” tarafından deputatı
2010- 2014 ss.- QMC Yuqarı şurasınıñ deputatı. Regionlar Firqası adından saylanıldı. Qırım parlamentinde “Qırım regionları” fraktsiyasınıñ terkibine kirdi.
2013- 2014 ss.- Prezident Yanukoviçniñ yanında qırımtatar halqınıñ vekiller Keñeşiniñ reisi.
2014 ss.- QC DŞ reisi ve onıñ muavinleriniñ hızmet idareliginiñ QCDK reis mesleatçısı
2014 s.- “Bir Rusiye” adından Qırım Cumhuriyeti DŞ deputat namzeti.
