Pütin Qırım ve Cenübiy federal okruglarnı birleştirdi

28.07.201623:43

Vladimir Pütin Qırım ve Cenübiy federal okruglarnı birleştirmek aqqında ferman imzaladı.

Vesiqada qayd etilgeni kibi, «federal organlarınıñ işini semereleştirmek maqsadınen» olar Cenübiy okrugqa çevirildiler.

Onıñ yolbaşçısı olaraq cenübiy okrugnıñ başı Vladimir Üstinov tayinlendi.
Endiden soñ Cenübiy okrugnıñ erkânına Adıgeya Cumhuriyeti, Qalmıq Cumhuriyeti, Qırım Cumhuriyeti, Krasnodar, Astrahan, Volgograd, Rostov kilâyetleri ve Aqyar kireler.

Okruglarnıñ birleştirilecegi aqqında iyül 28 künü saba RBK-ğa federal memurı bildirdi. Onıñ añlatqanına köre, Qırım federal okrugı vaqtınca, yarımada Rusiyeniñ erkânına integratsiya oluvına qadar meydanğa ketirilgen edi.

Cenübiy federal okrug 2000 senesi meydanğa ketirilgen edi, onıñ erkânına Rusiyeniñ avropa qısmınıñ cenübiy tarafı kirsetildi. Amma 2010 senesi Şimaliy-Kavkaz federal okrugı onıñ erkânından çıqarıldı.

Qırım federal okrugı Pütinnıñ 2014 senesi mart ayında imzalağan fermanınen meydanğa ketirildi. Onıñ erkânına Qırım Cumhuriyeti ve Aqyar şeeri kirdiler.
Hatırlatamız, Aqyarnıñ sabıq gübernatorı Sergey Menâylo prezidentniñ fermanı ile Sibir federal okrugına yollanıldı.

Avdet bildirgeni kibi, Qırım federal okrugında Rusiye Prezidentiniñ vekâletli temsilcisi Öleg Belaventsev Şimaliy-Kavkaz okrugına vekâletli temsilci olaraq tayin etildi.

Фото аватара

Автор: Редакция Avdet

Редакция AVDET