Elvira Sarıhalil: Qırımtatar medeniyetiniñ eñ güzel tarafı — onıñ maneviy temeli

13.08.20160:25

Milliy medeniyetimizniñ zemaneviy vaziyeti. Medeniyetimiz ilerile, inkişaf ete dep ayta bilemizmi? Yoqsa qırımtatarlar alâ daa künümizde keçmişni tüşünip otura. Avdet bu suallerge  qırımtatar cemiyetinde belli olğan şahslarğa cevap bermege rica etti. 

Qırımtatar medeniyetine icadiy ustalıqnı mukkkemelleştirmek kerek. Lâkin maddiy destekniñ zarurlığını da qayd etmek kerek. Bularnı inkişafnıñ esasları kibi körem.

Halqımız ziyadesinen keçmişke baqqanı yañlış olğanını tüşünem. Çalğıcılarımıznıñ üyken nesili eñ zor vaqıtta bile medeniyetimizni saqlay bildiler, lâkin bunıñ ile toqtalmaq kerekmey.

Olarınıñ saqlap qaldırğanlarından başqa, bizge de iş tüşe. Çoq şey yapmamız mümkün. İnkişaf degeni — özüni acımaqtan vazgeçmek demek. Bu qadar zengin medeniyetimiz elimizde bar eken, oña yol açmaq yeterli olur. İcadiy yolda serbest olmaq kerek. Sizni ve sanatıñıznı konserva qutasına oturtacaq insanlardan saqınıñ. Özüñiz içün mabut yaratmañız, Allahnıñ idaresinen öz üstüñizden çalışıñız. Er kes begensin, er kes añlasın dep areket etmeñiz. Özgünligiñizni coymañız. Bir-biriñizni seviñiz ve özüñizge keder etmeñiz.

Qırımtatar medeniyetiniñ eñ güzel tarafı — onıñ maneviy temeli — imanı. Onsız inkişafımızğa yönetilgen bütün işimiz — deñiz köpügi dayın.

Elvira Sarıhalil 

Фото аватара

Автор: Редакция Avdet

Редакция AVDET