Arzı Selim, jurnalist: Özüñizden başlap – ana tiliñizni ögreniñiz!

17.08.201613:58

Milliy medeniyetimizniñ zemaneviy vaziyeti. Medeniyetimiz ilerile, inkişaf ete dep ayta bilemizmi? Yoqsa qırımtatarlar alâ daa künümizde keçmişni tüşünip otura. Avdet bu suallerge  qırımtatar cemiyetinde belli olğan şahslarğa cevap bermege rica etti.

Halq medeniyeti degende ilk evelâ tilni qayd etmelimiz. Milletimitzni tek haytarmanı oynay bilgen ve çiberiklerni pişire bilgen taraftan tanığanları zaman pek qayğılanam.

Medeniyet yır ve oyunnen sıñırlanmay. Onıñ esasında milletniñ bilgi seviyesi ve er yerde, er zaman ana tiliniñ qullanması kire. Şimdiki vaqıtta “aqılları ile üstün olğan” bir çoq gençlerimiz içtimaiy ağlarda adetlerimizni ve medeniyetimmizni saqlamaq kerekligi aqqında yaza bereler. Lâkin böyle “fikirlerden” qursağım toq. Çünki bularnıñ episi rusça, em de hatalarnen yazıla. Özüñizden başlañız – ana tiliñizni ögreniñiz! Amdi Giraybay, Noman Çelebicihan, Şevki Bektore, Eşref Şemi-zadelerniñ tilini. Amet Özenbaşlı, Reşat Mediyev, Bekir Çoban-zade, Noman Çelebicihannıñ barem birer maqalesini oquñız! Ulu tarihımıznı bilmegeñimiz – eñ büyük belâmız! Bilgenleri ise az olsalar da, 25 sene devanımda biri kelip te inkişafımızğa tesir eter dep beklemediler, halqımıznıñ tilini, tarihını öz başına ögrenmege tırışa ediler. Lâkin, tekrar etem, olar pek azlar.. Caillik! Budır bizim baş belâmız!

Author: Редакция Avdet

Avdet gazetası