Qırımtatar halqı Meclisiniñ (Rusiyede ekstremistik teşkilât dep tanılğan – Avdet) ve bazı Qurultay azalarını, Aqmescitteki ekstremizmge qarşı küreş alıp barğan merkezge davet eteler.
Bu aqta Meclis reisiniñ birinci muavini Nariman Celâl haber etti.
Onıñ aytqanına köre, şimdilik olarnı telefon arqalı tek bazı sualler bermek içün soravğa davet ete ekenler.
«Olarnı Meclis azaları Emirali Ablayev, Ruslan Yakubov ve Ayder Acimambetovnıñ vekâletligini toqtatuv ve A. Acimambetovnı reis muavini vazifesinden boşatılğanınıñ sebepleri meraqlandıra», — dep yazdı Celâl özüniñ Facebook saifesinde.
Hatırlatamız, Emirali Ablayev, Ruslan Yakubov ve Ayder Acimambetov siyasiy tedbirlerde iştirak etkenleri (saylavlar, körüşüvler, teşviqat ve il.), em de matbuat vastalarında qırımtatar halqı Qurultayınıñ vekili statusınen bir kelmegen çıqışları içün, Meclis azaları olaraq faaliyetleri toqtatılğanınıñ esas sebebi oldı.
2016 senesi aprelniñ 26-da Qırımnıñ Yuqarı mahkemesi qırımtatar halqınıñ Meclisini ekstremistik teşkilât olaraq tanıdı ve Rusiyede onıñ faaliyetini yasaq etti. Sentâbrniñ 29-da Rusiyeniñ Yuqarı mahkemesi Qırım Yuqarı mahkemesiniñ qararına berilgen apellâtsiyanı baqacaq.
