Endi oktâbr ayında belli qırımtatar dissidenti ve uquq qoruyıcı, Ukraina prezidentiniñ qırımtatar halqı meselelesi boyunca vekâletlisi Mustafa Cemilev aqqında «Mustafa» adlı vesiqalı filmniñ taqdim etilmesi planlaştırıla.
Film ğayesiniñ saipleri, mühbir Olga Morkovaya ve QırımSOS idarecisi Tamila Taşeva ola. Ernest Sarıhalil film rejissörı ola, dep bildire «QırımSOS».
«Mustafa Cemilevniñ ömründen esas vaqialar aqqında añlatmağa qarar aldıq: sürgünlik, onıñ birinci apiske qapatılması, açlıq. Tahminen bu yol boyunca areket ettik. Vahtang Kapiani, buña esaslanıp, film qaramanlarından intervyu alğan edi. Mustafa ağanıñ ömrü aqqında ikâye etkenini temel olaraq aldıq. Buña onen şahsen körüşkenlerniñ, yani dissidentler, uquq qoruyıcılarnıñ hatıralarını qoştıq. İntervyu büyük olğan, bunıñ içinde çoq meraqlı şey aytıldı. Kerekli söz saylap almağa ağır edi, bunıñ içün, yazıq ki, montaj yapılğanda çoq şeyni kesmek kerek oldı. Film, kadr artındaki sessiz oldı, bunıñ içün tarihnı qaramanlar añlatmaq kerek edi», — dep añlattı film rejissörı Ernest Sarıhalil.
QirimInfo malümatına binaen, «Mustafa» vesiqalı filmini «Gençlik» («Molodost») festivalinde seyir etmek mümkün olacaq.
Foto: Akim Seitablayev
