Qırım talebeleri içün rusiyeli aliy oquv yurtlarına kvotalar lâğu etildi

05.10.201616:00

Qırım ve Aqyar mektep mezunları Rusiye Federatsiyası aliy oquv yurtlarına kirmek içün umumiy konkursta iştirak etecek.

Bu sene kiriş kampaniyasınıñ esas deñişmelerinden biri cumhuriyet ve Aqyar talebeleri içün kvotalarnıñ lâğu etilmesi oldı, dep bildirile Sankt-Peterburg devlet universitetiniñ matbuat hızmetinde.

Amma qayd etile ki, Qırım abituriyentleriniñ tek Yekâne devlet imtianını bermek degil de, aliy oquv yurtlarında kiriş imtianlarından keçmek de imkânı olur.

Ekinci müim yañılıq, aliy oquv yurtları mektep talebeleri arasında keçirilgen olimpiada ğaliplerine bergen imtiyazlar aqqında malümatnı ilân etüv müddetlerinen bağlı. Evel bu tek oquv yılı soñunda belli olğan edi, endi ise, aliy oquv yurtları malümatnı oktâbr ayında bildirecek.

Aqıl yarışlarında yüksek seviye köstergen mektep talebeleri aliy oquv yurtuna kiriş imtianını bermeyip, kire bile. Böyle imkân Yekâne devlet imtianında eñ azdan 75 baa alğan mektep talebelerine berile.