Eki kün içinde Aqmescitten 60-tan ziyade uçaq seferi lâğu etildi

06.10.201620:05

Oktâbr 6-da Aqmescit ava limanından 11 rusiyeli şeerge uçaqlar seferge çıqmadı.

Aqmescit ava limanı online tablosındaki malümatqa binaen, Moskva, Rostov-na-Donu, Nijnevartovsk, Mineralnıye Vodı, Samara, Anapa, Saratov, Krasnodar, Sankt-Peterburg, Qazan ve Omsk şeerlerine seferler lâğu etildi.

Umumen olaraq, 23 uçaq seferi lâğu etildi.

Ava limanı matbuat hızmetiniñ haber etkenine köre, bütün seferler plan boyunca lâğu etildi ve bunıñ sebebi, qayd etilgen yönelişlerde navigatsiya qapatılması oldı.

Avdetniñ bildirgenine binaen, oktâbr 5-te 40 uçaq seferi lâğu etildi.

«Bularnıñ yolcuları yoq edi, bu seferlerge biletler satılmadı», – dep bildire «İnterfax» ava limanı temsilcisiniñ sözlerini. Bu seferler «VİM-Avia», Red Wings, Saratov airlines, Pegas fly, «Yamal» ve diger şirketler tarafından ömürge keçirilmek kerek edi.

Фото аватара

Автор: Редакция Avdet

Редакция AVDET