Qırımda balalarğa tamğalı futbalkalarnen oynamağa yasaq ettiler

08.10.201617:30

Bağçasaray rayonı Bürlük (Vilino) köyündeki medeniyet evi müdiri «Mercan» bala oyun taqımına qırımtatar milliy timsali olğan tamğa kösterilgen futbolkalarnen sanağa çıqmağa qatiyen yasaq etti.

Vaqia köy kününe bağışlanğan merasim keçirilgen vaqıtta yüz berdi.

Qırımtatar Milliy Meclisi reisiniñ muavini, Bağçasaray rayon memuriyeti yolbaşçısınıñ sabıq muavini İlmi Umerovnıñ bildirgenine köre, balalar futbolkalarnı ters kiyip oynamağa mecbur oldı.

«Oynağan balalarnıñ ana-babalarından ğayrı, zalda qırımtatarlar yoq edi, taqım yolbaşçısı ise, şaşmalap, ne yapacağını bilmedi», — dep ayttı o.

İlmi Umerov taqım yolbaşçısına ükümet tarafından teşkil etilgen merasimlerde iştirak etmemege tevsiye etti, bu vaqiada ise, onıñ fikrince, oynamaqtan vazgeçip, bayramdan ketmek kerek edi.

Author: Редакция Avdet

Avdet gazetası