Alim Temur Kurşutov Almaniyada qırımtatar arbiy esirleri aqqında añlattı

10.10.201615:20
Участники конференции "Мусульмане Центральной Германии: в прошлом и настоящем"

Bu sene sentâbr ayında Magdeburg (Almaniya) şeeri universitetinde «Orta Almaniya musulmanları: keçmiş ve kelecekte» halqara ilmiy konferentsiyası keçirildi.

Merasimde Almaniya, Rusiye, Ukraina, Poloniya, Litvaniya, Türkiye alimleri iştirak etti. Konferentsiyanıñ esas mevzusı I-ci Cian cenkine bağışlandı. Merasim çerçivesinde maruzalar oquldı, yañı tedqiqat boyunca numayışlar taqdim etildi. Konferentsiyada bulunğanlar meraq ile alimler Miste Hotopp-Rikkeniñ «I-ci Cian cenkinde orta Almaniyada musulmanlar: yañı kerçekler, eski stereotipler», Ştefan Tayligniñ «Kayzer ve sultan arasında. Türk Ali Nuri – Kayzer zabiti ve Osmanlı Devleti soñki ulu veziriniñ oğlu», prof. İskander Gilâzovnıñ «I-ci Cian cenki tatar arbiy esirleri ve olarnıñ Almaniya alğısı», prof. Svetlana Çervonnayanıñ «Almaniya ve Poloniyada cami mimarcılığı», Temur Kurşutovnıñ «Qırımtatar arbiy esirleri ve XX-ci asırnıñ birinci çeriginde Almaniya ve Qırım arasındaki medeniy-siyasiy munasebetler» maruzalarını diñledi.

İlmiy forum sentâbr 11-de aqşam Magdeburg şeeriniñ tarihiy müzeyinde kontsertnen yekünlendi, programmada qırımtatar çalğıcıları Cemil Karikov, Temur Vahapov, bunen beraber, Magdeburg yerli muzıka taqımları iştirak etti. Qayd etmek kerek ki, seyirciler «Tım-tım» qırımtatar nağmesini eñ sıcaq qarşıladı. Konferentsiya Magdeburg universiteti ve Qavqaz, Tatarika ve Türkestannı ögrenüv İnstituti tarafından teşkil etildi.

foto-temur-kurshutov

Temur Kurşutov soldan ekinci

kontsert-posle-konferentsii

Author: Редакция Avdet

Avdet gazetası