ATR Litvaniyağa köçecek ola

10.10.201622:10

ATR qırımtatar telekanalı, Ukraina devlet bücetinden para ayırılmağanı sebebinden, Litvaniyağa köçmege planlaştıra.

Bu aqta malümatnı ATR telekanalında bildirdiler.

«Litvaniyanen çoq tarihiy bağımız bar, olardan er vaqıt destek ola. Meselâ, baarde Qırımtatar Kongressi icra komitetiniñ toplaşuvı Litvaniya Seymi binasında keçirildi. Litvaniya bütün siyasiy liderleriniñ Qırım boyunca noqta-i nazarı birdir», – dep añlattı telekanalnıñ baş haber muarriri Osman Paşayev.

Paşayev hatırlattı ki, ükümet, öz fermanınen, telekanalğa devletten 40 million grivna er senelik yardım berecegini vade etti. Amma, Paşayevniñ qayd etkenine köre, Maliye nazirligi öyle de para ayırmadı, dep bildire «Ukrainskaya pravda».

«Soñki delil iqtisadiydir: Avropa komissiyası Avropa parlamentiniñ maliyeviy destegi aqqında tevsiyeni (Avropa parlamentiniñ Qırım boyunca 4.02.2016 qabul etken rezolütsiyasınıñ 9-ci maddesi) ömürge keçirse, telekanalnı Avropa Birligi territoriyasında, onıñ teminlenmesine eñ kiçik masraflarnen, yerleştirmek elverişlidir», – dep ayttı Paşayev.

Onıñ sözlerine binaen, kanalnıñ öz parası bu seneniñ soñuna qadar zar-zornen yetecektir.

Foto: İldar İbragimov

Фото аватара

Автор: Редакция Avdet

Редакция AVDET