Qırımtatar qasabasında şeerniñ esas çöplük obasınıñ qapatılması planlaştırıla

10.10.201614:10

Seneniñ soñuna qadar Aqmescitte şeer kenarında, çoqusı qırımtatarlar yaşağan Boğurça (Kamenka) qasabası yanında, eñ büyük çöplük obalarından biriniñ qapatılması planlaştırıla.

Bu aqta malümatnı Qırım mesken-kommunal hocalığı naziri Sergey Karpov bildirdi.

«Bugün, Boğurçada rekultivatsiyaen oğraşacaq teşkilâtnıñ kelecekte işini qolaylaştırmaq içün, poligonda çöplük, çeşitine köre, ayırıla», – dep qayd etti Karpov.

Qırım ekologiya ve tabiat resursları naziri Gennadiy Narayev ilân etti ki, yarımada çöplük poligonlarınıñ çoqusı toldurıldı ve bularnıñ ileride qullanılması mümkün degil. Bunıñ içün qalımtı qoyulacaq 15 meydançıq ile Qırımnı temizlemek içün usul azırlanıla, dep bildire «AN Krım».

Bundan evel Aksönovnıñ muavini Yuriy Gotsanük ayttı ki, çöplük obalarına qarşı yerli akimiyet ve cemaatçılıqnıñ beraberlikte yapılğan işi vastasınen küreşmek kerektir.

Bundan evel Avdet haber etti ki, Boğurça qırımtatar qasabasınıñ kenarları çöplükke tolu.

Author: Редакция Avdet

Avdet gazetası