Mustafa Cemilev Saharov mukâfatınıñ laureatı ola bile

11.10.201618:45

Qırımtatar Milliy Meclisiniñ sabıq reisi, Ukraina prezidentiniñ qırımtatar halqı meseleleri boyunca vekâletlisi Mustafa Cemilev 2016 senesi Andrey Saharov adına «Fikir serbestligi içün» Avropa parlamentiniñ mukâfatı berilecek üç finalist sırasında kirdi.

Cemilev Saharov adına mukâfatqa Avropa parlamentiniñ eñ büyük fraktsiyası olğan Avropa halq firqası, bunen beraber, «Avropalı konservator ve islâatçılar» avroskeptik taqımı tarafından namzet olaraq kösterildi.

Cemilevden ğayrı, finalğa, salı künü keçirilgen qapalı rey berüv neticelerine binaen, «yeşiller» ve soldakiler tarafından namzet kösterilgen, türkiyeli mühbir-muhalif Can Dündar keçti.

Bunen beraber, mukâfatnı sotsialist ve liberallar tarafından namzet olaraq kösterilgen yezid halqı temsilcileri Nadâ Murad ve Lamiyya Acı Başar ala bile, olar öz halqınıñ aq-uquqlarını, hususan, Rusiye Federatsiyasında yasaq etilgen «İslâm devleti» terroristik taqımınıñ İraqta qulları olğan qadınlarnı qorçalay. Mukâfat laureatı oktâbr 27-de belgilenecek.

Author: Редакция Avdet

Avdet gazetası