«Narazılıq alanları» iştirakçilerine Aqmescit rayonında topraq berilecegi aqqında söz bereler

11.10.20168:40

Qırım Cumhuriyeti Mal ve topraq munasebetleri nazirligi bugünki künde «narazılıq alanları» iştirakçilerine ve vatandaşlarnıñ diger imtiyazlı kategoriyalarına ev qurucılığı içün Aqmescit rayonında topraq qasabalarını belgiley.

Bu aqta «Sputnik v Krımu» («Qırımda yoldaş») radiosınıñ yayınında müessise yolbaşçısı Anna Anühina bildirdi.

«Şahsiy ev qurucılığı içün topraq damartılarını tek Cumhuriyet topraqlarından ayıra bilemiz. Şimdi şahsiy ev qurucılığı içün kelişken topraq damartılarını belgileymiz, amma bu Aqmescit şeeri tışında olacaq. Bu, şeer yanında yerleşken Aqmescit rayonındaki köyler ola bile», – dep qayd etti nazir.

Anühina hatırlattı ki, ev qurucılığı içün topraq damartıları vatandaşlarnıñ imtiyazlı kategoriyalarına Aqmescit rayonındaki Saraylı Qıyat (Mirnoye) köyünde berildi.

«Bu, tek «narazılıq alanları» sabıq iştirakçileri degil de, amma çoq balalı qorantalar, Ulu Vatan cenki veteranları ve diger kategoriyalardır. Olarnıñ da topraq almaq aqqı bar. Bütün bu vatandaşlar bir sırada tura ve nevbet boyunca topraq damartılarını ala», – dep qayd etti Mal nazirligi yolbaşçısı.

Bundan evel Qırım Cumhuriyeti Milletlerara munasebetler ve sürgün etilgen vatandaşlar meseleleri boyunca Devlet komitetiniñ reisi Zaur Smirnov bildirdi ki, Aqmescit rayonındaki Saraylı Qıyat köyünde nevbette turğan vatandaşlarğa, «narazılıq alanları» sabıq iştirakçilerine topraq damartıları ayırılacaq qasaba belgilendi. İşbu qasabada 3791 topraq damartısı bar. Müessise yolbaşçısınıñ sözlerine binaen, bu yerde 3,7 biñ mesken evi yerleşecek, bunen beraber, infrastruktura inkişaf etmesi planlaştırıla, dep bildire RİA-Krım agentligi.

Author: Редакция Avdet

Avdet gazetası