QitSoftware (Qirim IT) taqımı bedava öz özüne qırımtatar interaktiv ders kitabını, Lafazan Efendi ilâvesini işlep çıqardı.
İlâve zemaneviy interaktiv kitap şeklinde yapıldı, onıñ er saifesinde, mündericege köre, sözler taqdim etile. İlâveniñ şaqalı adı – Lafazan Efendi.
İlâveni işlep çıqarğanlarnıñ Avdetke bildirgenine köre, qullanıcınıñ menüden kategoriyanı saylamaq imkânı bar. Diñlenilgen sözler diger tüsnen qayd etile.
«Lafazan Efendi offline ilâvesi ola, yani internet ağına bağlanmasınıñ keregi yoq. Bunen beraber, ilâve ğayrı ticariydir, onıñ esas maqsadı – qırımtatar tili inkişafına isse qoşmaqtır», – dep añlattı programmacılar.
Olarnıñ sözlerine binaen, QitSoftware (Qirim IT) taqımı bu kibi ilâvelerniñ inkişafı ve işbu ilâve boyunca işini devam etecek.
Bu, programmacılar taqımınıñ ilk ilâvesi degil. Bundan evel Luğat qırımtatar sözlügi işlep çıqarıldı.
«Amma bu, Canlı Luğat degil. Bizim luğatımızda da yañı sözlerni ögrenmek imkânı bar», – dep qayd etti programmacılar.
Avdet elde etken malümatqa köre, QitSoftware (Qirim IT) taqımı terkibine QMPU informatika fakultetiniñ qırımtatar mezunları kire. Olarnıñ episi büyük IT-şirketlerinde çalışa.
«Halqımız içün içtimaiy leyhalarnı ömürge keçirmek maqsadınen birleştik», – dep ayttı gençler.
İlâveni PlayMarketten işbu link boyunca, ya da QitSoftware saytından (link bu yerde) almaq mümkün.
Avdetniñ evel bildirgenine köre, Medeniy Qırım qırımtatar gençleri teşebbüs gruppası iOS ve Android smartfonları içün qırımtatarca-rusça ve rusça-qırımtatarca luğat ilâvesini işlep çıqardı. Canlı Luğat ilâvesi medeniye.org luğatınıñ esasında azırlanıldı.
