Qırım müftiyatında bugünki tintüvler boyunca izaat berdiler

12.10.201622:50

Qırım müftisiniñ muavini Esadullah Bairov bugün qırımtatarlarnıñ evlerinde keçirilgen tintüvler ve RF Cinaiy kodeksiniñ 205.5 maddesi (terroristik teşkilâtnıñ faaliyetini teşkil etüv ve bu faaliyette iştirak etüv) boyunca yaqalavğa izaat berdi.

Onıñ sözlerine binaen, tintüvler keçirilgen vaqıtta «Hizb ut-Tahrir» teşkilâtınıñ malümatı olğan edebiyat, fleş-kartları tapıldı.

«Hizb ut-Tahrir», Rusiyede yasaq etilgen ve terroristik sayılğan teşkilâttır. Bunıñ içün bu firqa bölükleriniñ teşkil etilmesi qanun boyunca taqip etile. Bütün musulmanlarnı bu areketke diqqatlı olmağa ve, özüni ve öz qorantalarını qorumaq içün, mütenasip areketler etmege çağıramız», – dep ayttı Bairov.

Avdetniñ bildirgenine köre, bugün, oktâbr 12-de rusiyeli uquq qoruyıcılar Aqmescit rayonındaki Mamaq (Stroganovka) köyünde (Uzair Abdullayev ve Teymur Abdullayev) ve Boğurça (Kamenka) qasabasında (Rustem İsmailov, Emil Cemadinov) yaşağan dindar qırımtatarlarnıñ evlerinde tintüvler keçirdi. Uquq qoruyıcılar, Aqmescitteki Boğurça (Kamenka) qasabasında yaşağan Rustem İsmailovda tintüv keçirgen soñ, onıñ babası Yaqub İsmailovnıñ Qarasuvbazardaki evine yol aldı. Rustem İsmailovnıñ evinde tintüv keçirilgen vaqıtta onı urdılar ve oña namaz qılmağa yasaq ettiler.

Фото аватара

Автор: Редакция Avdet

Редакция AVDET