«Hizb ut-Tahrir» işi boyunca yaqalanğanlar eki ayğa apiske qapatıldı

13.10.201622:50

Aqmescitteki Kiyev rayon mahkemesi oktâbr 12-de evlerde keçirilgen tintüvlerden soñ yaqalanğan beş qırımtatarnı dekabr 11-ge qadar apiske qapattı.

Bu aqta adliyeci Emil Kurbedinov Facebook saifesinde bildirdi.

«Pek çoq soy-sop, diñleyici ve pervasız olmağan kişi mahkemede bulundı, bu yerde bir vaqıt ukrain olğan mahkemeci beş qırımtatarğa, Qırım musulmanına qarşı yaqalama cezasını belgiley edi. Fikrimce, eñ kiçik saylanılğan, içine tek üç diñleyici sığğan zal olğanından ğayrı, mahkemeci İnsan aqları konventsiyasını körmemezlikke urdı ve Teymurnı (Teymur Abdullayev – Avdet) kelepçenen ve demir qafeste qaldırdı, bundan soñ onıñ ağlağan anasını quvdı», – dep añlattı adliyeci.

Onıñ sözlerine binaen, imaye tarafı mahkeme qararına qarşı şikâyet etecek ola.

«Teymur Abdullayev 205.5 maddesiniñ 1-ci qısmı, Uzair Abdullayev, Rustem İsmailov, Ayder Saledinov ve Emil Cemadinov 205.5 maddesiniñ 2-ci qısmı boyunca qabaatlana», – dep ilân etti adliyeci.

Aqmescit rayonında yaqalanğan qırımtatarlarnı Qırım insan aqları boyunca kontakt gruppasınıñ azaları, adliyeci Edem Semedlâyev ve onıñ zenaatdaşı Emil Kurbedinov imaye etecekler.

Avdetniñ bundan evel bildirgenine köre, oktâbr 12-de rusiyeli uquq qoruyıcılar dindar qırımtatarlarnıñ evlerinde tintüvler keçirdi, musulmanlarnıñ bazıları yaqında acılıqtan qayttı. Yaqalanğan qırımtatarlarnıñ er biriniñ bir qaç balası bar.

Teymur Abdullayev – beş bala, bir bala bir yaştan kiçik.
Uzair Abdullayev – dört bala.
Ayder Saledinov – dört bala, bir bala bir yaştan kiçik.
Emil Cemadinov – eki bala ve ağırayaqlı apay.
Rustem İsmailov – üç bala.

Фото аватара

Автор: Редакция Avdet

Редакция AVDET