Bağçasaray rayon mahkemesi faal qırımtatar teşebbüsçisi Emine Avamilevanı Meclisniñ «yasaqlanğan toplaşuvında» iştirak etkeni içün 750 ruble para cöremesinen cezaladı.
Avdetniñ bundan evel bildirgenine köre, qırımtatar faalleri İlmi Umerov, Şevket Kaybulla, Sadıh Tabah, Ali Hamzin, Enver Kurtiyev, Bekir Mamutov Qırımtatar Milliy Meclisi (Rusiye Federatsiyasında ekstremistik teşkilât olaraq tanılğan) toplaşuvında iştirak etkenleri içün para cöremesinen cezalandı.
Hatırlatamız ki, İlmi Umerov ve Bekir Mamutov olarğa qarşı çıqarılğan mahkeme qararlarına şikâyet etmege niyetlene.
Mustafa Mauşevnıñ işi — oktâbr 20-de, Dilâver Akiyevniñ işi — oktâbr 24-te baqılacaq. Bundan evel olar, mahkemede muzakerelerni qırımtatar tilinde alıp barmağa istegenleri aqqında bildirdi.
2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve Rusiyede onıñ faaliyetini yasaq etti. Sentâbr 29-da Rusiye Yuqarı mahkemesi Meclisniñ yasaq etilmesi aqqında Qırım Yuqarı mahkemesiniñ qararını tasdıqladı.
