Jamalanı «Eurovision» yarışında iştirak etmege onıñ qırımtatar sevgilisi teşviq etti

18.10.201612:10
джамала и бекир сулейманов

Eurovision-2016 ğalibi Jamala qırımtatar yigitinen körüşe. Sevgilisiniñ adı Seit-Bekir Suleymanov.

Jamalanıñ sözlerine binaen, o, Seit-Bekir ile qırımtatar aqşamında tanış oldı ve onen endi bir yıldan ziyade körüşe. «Svitske jittâ» («Lâdiniy ayat») programmasına bergen intervyusında yırcı ayttı ki, Seit-Bekirni birden begengen. O, onıñ ana-babasınen tanış, Seit-Bekir de Jamalanıñ ana-babasınen tanışlar.

Jamalanıñ hatırlağanına köre, olar tek tanış olğanda, Seit-Bekir ile orta mevzular tapacağından şübelene edi, çünki o, riyaziyatçı, iqtisatçı ola, amma yañlıştı. Bugün sevgilisiniñ riyaziyat fikir etüvi yırcığa çoq saalarda yardım ete.

«Sizge daa bir şey aytayım ki, hususan o meni «Eurovision» yarışında iştirak etmege teşviq etti. Men aytqan edim: yoq, iç bir vaqıt! O ise, cedvellerni tizdi, müsbet ve menfiy taraflarnı belgiledi», − dep añlattı Jamala programma alıp barıcısı Katâ Osadçayağa.

Toy planları aqqında Jamala ayttı ki, bu munasebetler onıñ içün pek ciddiydir.

«Aqayğa çıqmaq teklifini daa almadım, amma bu aqta ciddiy laflarımız ola», − dep ayttı yırcı.

Jamalanıñ sevgilisi aqqında çoq malümat belli degil. O, Aqmescit şeerinde doğdı, «tibbiy radiofizika» ihtisası boyunca Şevçenko adına Kiyev milliy universitetini ve Kiyev iqtisat mektebini bitirdi. Çift beraberlikte halq ögüne sentâbr ayınıñ soñunda keçirilgen Manhetten qısqa film festivalinde çıqtı.

dzhamala1