Aqyarda yüz bergen yanğın sebebinden ev sakinleri tahliye etildi

20.10.201614:30

Aqyarda Kojanova soqağındaki çoq daireli evlerniñ birinde yanğın yüz berdi, bundan sebep sakinler tahliye etildi.

Aqyar boyunca Rusiye Fevqulade vaziyetler nazirligi matbuat hızmetiniñ malümatına binaen, ateş keçken saba saat 04:30-da peyda oldı.

Qurtaruv hızmetine bildirildi ki, daireden tuman çıqa ve ateş körüne, balkonda ise aqay kişi turıp, yardımğa çağıra.

Vaqia yüz bergen yerge birden yanğın-qurtarıcı bölüginiñ eki taqımı çıqtı.

«Merdiven vastasınen aqay kişi yerge tüşürildi. Bunen beraber, yanğıncılar yuqarı qatındaki sakinlerni tahliye etip başladı. Qurtarıcılar bütün dairelerni baqıp çıqtı, sakinlerni uyattı ve olarnı taze avağa çıqardı. Umumen olaraq, on adam tahliye etildi», — dep añlattılar matbuat hızmetinde.

Aynı vaqıtta daa bir taqım yanğın yüz bergen dairede teşkerüv keçire edi. Mefruşat (mebel) yanğan aşhanede bir elâk olğan kişi tapıldı, dep bildirdiler fevqulade vaziyetler müessisesinde. Meydanı 9 kvadrat metrni teşkil etken yanğın saat 05:14-te bütünley söndürildi. Onıñ sebebi ögrenile.
pozhar-v-sevastopole1

Author: Редакция Avdet

Avdet gazetası