Qırım GİBDD-sı Aqmescitte tıqanıqlıqlarnı yoq etüv usullarını teklif etti

22.10.20160:13

GİBDD Qırım idaresi Aqmescit memuriyetine şeerde avtomobil tıqanıqlıqları meselesini çezmege teklif etti.

Qırım GİBDD-sı yol nezaretiniñ üyken devlet inspektorı Vladimir Pogorolovnıñ bildirgenine köre, memuriyetke yol areketiniñ avtomatik idare etüv sistemasınıñ işke tüşürilmesi teklif etildi. Birinci basamaqta Sevastopolskaya soqağı, Kirov caddesi ve Karaimskaya soqağında «yeşil dalğa» svetofor idare etüv sistemasınıñ işke tüşürilmesi teklif etile. Ekinci basamaqta yoldan farqlı seviyede cayav keçitleriniñ qurulması planlaştırıla. Bunı Sevastopolskaya soqağında Danilov soqağından Zalesskaya soqağına qadar, Şevçenko adına park, Kozlov soqağı ile yol çatışması rayonında da yapmaq kerek.

Bunen beraber, Devlet avtoinspektsiyasında Kuybışev meydanı rayonında ve Lenin ve Pavlenko soqaqlarınıñ çatışmasında avtobus turaqlarınıñ yerlerini deñiştirmege ve yol ceplerini yapmağa teklif eteler.

Bundan da ğayrı, Pogorolovnıñ fikrince, yol tıqanıqlıqları peyda olmasında tek şeer yol sisteması degil de, aydavcılar da qabaatlıdır. Olar yol areketi qaidelerini sıq-sıq boza.

Onıñ sözlerine binaen, bu bozuvlar neticesinde yol kenarında maşnalar qanunsız qoyula, bu ise naqliye areketine qolaysızlıq ketire, dep bildire «Krıminform».

Фото аватара

Автор: Редакция Avdet

Редакция AVDET