Bağçasarayda qadimiy binanıñ yıqtırılması başlandı

24.10.201612:25
снос исторического здания в бахчисарае

Bağçasarayda Lenin soqağı, 97 adresi boyunca yerleşken XVII asırğa ait qadimiy binanı yoq etmege başladılar. Şeer akimiyeti, binanıñ medeniyet asabalığı obyekti olaraq tanılması meselesi boyunca toplaşuvnı beklemey.

Bu aqta Facebook ağında yerli faaller bildirdi.

«Qırım tamır sakini olmağan, uzaqtan kelgen yañı şeer yolbaşçısı siziñ yerine bütün qararlarnı ala!!! Onıñ Bağçasarayda bütün «eski şeer» rayonını yoq etmek planı bar! Bu vaziyette olğanı kibi, kimseden razılıq soramaz!!!» – dep yazdı bu meselege pervasız qalmağanlardan biri olğan Kseniya Znak.

Onıñ malümatına binaen, binanıñ medeniyet asabalığı abidesi olğanını tanımaq içün, cemaatçılar ekspertiza keçirmek içün para taptı, bunen beraber, onı bütünley tamir etmek içün yatırımcını tapacaqlar, dep söz berdiler.

Cemaatçılar havfsızlıq qaideleri bütünley bozulğanını da qayd etti: işler alıp barılğan rayonda balalar yüre, yaqında tükân çalışa.

Memuriyet yolbaşçısı Aleksandr Trânovnıñ bildirgenine köre, bina alınıñ qazaiy olğanı tanıldı ve onıñ yıqtırılması kerek. Buña memurnıñ tehnikiy neticesi bar. Medeniy asabalıq abideleri saqlavı boyunca komitette bildirdiler ki, Bağçasaray memuriyeti adına bütün yıqma ve yañı qurucılıqlarnı uyğunlaştırmaq talabınen eñ azdan üç mektüp yollanıldı. Amma buña iç cevap olmadı. O vaqıt, komitet reisiniñ muavini Vâçeslav Zarubinniñ sözlerine binaen, prokuraturağa muracaat etildi.

Фото аватара

Автор: Редакция Avdet

Редакция AVDET