Tasil naziri ve Qırım aliy oquv yurtları rektorları millionlar qazana

24.10.201617:40

Qırım Tasil nazirligi yolbaşçıları ve yarımada aliy oquv yurtları rektorlarınıñ aylıqları millionlar teşkil ete.

Böyleliknen, tasil naziri Natalya Gonçarova keçken sene 1 million 513 biñ qazandı, onıñ orta aylığı 126 biñ ruble ola. Nazirniñ birinci muavini Natalya Jurba keçken sene 1 million 216 biñ ruble qazandı. Nazir muavini Ayder Ablâtipov nazir qazanğanından 20 biñ ziyade aldı – 1 million 532 biñ ruble. Nazir muavini Oksana Krasnikova – 1 million 150 biñ ruble. Ve nazir muavini İrina Narkunas – 1 million 77 biñ ruble.

Aliy oquv yurtları yolbaşçılarınıñ da aylıqları azca degil. Qırım cumhuriyet diplomdan soñraki pedagogika tasili institutı devlet bücet oquv müessisesiniñ rektorı Aleksandr Rudâkov keçken sene içinde 3 million ruble qazandı. Böyleliknen, onıñ orta aylığı 250 biñ ruble teşkil etti. Rektornıñ birinci muavini İrina Denisenko 1 million 523 biñ ruble aldı. İlmiy iş boyunca rektor muavini Yuriy Dorofeyev – 1 million 811 biñ. İhtisas yükseltüv boyunca rektor muavini Lüdmila Naumova – 1 million 232 biñ ruble. Havfsızlıq ve umumiy meseleler boyunca müdir Sergey Bessonov – 1 million 396 biñ ruble. Kafedra müdiri Boris Açkinazi – 1 million 327 biñ ruble. Baş kâtip Olga Samofalova ise, 2 million 16 biñ ruble aldı.

QMPU rektorı Fevzi Yaqubov keçken sene 2 million 561 biñ ruble qazandı. V.İ. Vernadskiy adına QFU rektorı Sergey Doniç – 3 million 752 biñ. Rektornıñ birinci muavini Yelena Çuyan öz müdirinden de ziyade aldı – 5 million 972 biñ ruble. QFU baş kâtibi Svetlana Yemelyanova – 1 million 427 biñ qazandı, dep bildire «Krımskaya pravda».

Aynı vaqıtta, Krımstatnıñ malümatına binaen, Qırımda mektep ocaları, Cenübiy federal okrugda olarnıñ zenaatdaşları alğan aylığına köre, bir biñ ruble azca, ve Rusiyede orta aylığından 8 biñ ruble azca ala. Ocalarnıñ orta aylığı 24 700 biñ ruble teşkil ete. Mektepten aldın pedagogları, orta olaraq, 19 900 biñ ala. Qırım aliy oquv yurtları ocalarınıñ orta aylığı 37 620 biñ rubleni teşkil ete.

Фото аватара

Автор: Редакция Avdet

Редакция AVDET