Oktâbr 24-te Bağçasaray rayon mahkemesi Meclis kâtibiyeti yolbaşçısı Dilâver Akiyevniñ memuriy işi boyunca qarar çıqardı.
Mahkeme qırımtatar teşebbüsçisini Meclisniñ «yasaqlanğan toplaşuvında» iştirak etkeni içün 500 ruble para cöremesinen cezalandı.
Bu aqta Avdetke Qırımtatar Qurultayı Merkeziy saylav komissiyasınıñ reisi Zair Smedlâyev bildirdi.
Avdetniñ bundan evel bildirgenine köre, qırımtatar faalleri İlmi Umerov, Şevket Kaybulla, Sadıh Tabah, Ali Hamzin, Enver Kurtiyev, Bekir Mamutov, Emine Avamileva Qırımtatar Milliy Meclisi (Rusiye Federatsiyasında ekstremistik teşkilât olaraq tanılğan) toplaşuvında iştirak etkenleri içün para cöremesinen cezalandı.
Mustafa Mauşevniñ memuriy işi boyunca mahkeme toplaşuvı, mahkemeci hastalanğanı sebebinden, noyabr 2-ge keçirile.
2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve Rusiyede onıñ faaliyetini yasaq etti. Sentâbr 29-da Rusiye Yuqarı mahkemesi Meclisniñ yasaq etilmesi aqqında Qırım Yuqarı mahkemesiniñ qararını tasdıqladı.
