Bağçasaray rayon mahkemesi Qırımtatar Milliy Meclisi azası Zeynur Yaqubovnıñ memuriy işi boyunca toplaşuvnı qırımtatar tilinde keçirmek içün razılıq berdi.
Bu aqta video izaat bergen Yaqubovnıñ imayecisi Emine Avamileva bildirdi.
«Bağçasaray rayon mahkemesi, şahısnıñ, qaysı birine qarşı protokol tizilgen, ana tilini qullanmağa aqqı ve oña terciman, yani qıırımtatar tili tercimanı, berilmesi aqqında şikâyetni qanaatlendirdi», − dep bildirdi Avamileva.
Bağçasaray rayon mahkemesinde toplaşuv noyabr 1-de keçirilecek.
Zeynur Yaqubov Qırımtatar Milliy Meclisiniñ yasaqlanğan toplaşuvında iştirak etkeninen qabaatlana.
Avdetniñ bundan evel bildirgenine köre, qırımtatar faalleri İlmi Umerov, Şevket Kaybulla, Sadıh Tabah, Ali Hamzin, Enver Kurtiyev, Bekir Mamutov, Emine Avamileva, Dilâver Akiyev Qırımtatar Milliy Meclisi (Rusiye Federatsiyasında ekstremistik teşkilât olaraq tanılğan) toplaşuvında iştirak etkenleri içün para cöremesinen cezalandı.
Mustafa Mauşevniñ memuriy işi boyunca mahkeme toplaşuvı, mahkemeci hastalanğanı sebebinden, noyabr 2-ge keçirile.
2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve Rusiyede onıñ faaliyetini yasaq etti. Sentâbr 29-da Rusiye Yuqarı mahkemesi Meclisniñ yasaq etilmesi aqqında Qırım Yuqarı mahkemesiniñ qararını tasdıqladı.
