Tünevin, oktâbr 26-da Yaltada keçirilgen «Faaliyetler forumı. Qırım» umumrusiye halq frontunıñ forumında İbraim Şirin Rusiye prezidentini kelecek sene baarde ötkerilecek qırımtatar Hıdırlez bayramında davet etti.
«Bütün qırımtatarlar sizni körmekten memnün olur edi!» – dep ayttı Şirin.
Vladimir Putin ise qayd etti ki, bu bayram Rusiyede daa o qadar belli degil.
«Rusiyeniñ er angi yerinde, bugün Sabantuy olacaq, dep aytsañız, er kes bayram olğanını añlar. Hıdırlez şimdilik o qadar belli degil, amma ümüt etem ki, bu da Rusiyeniñ bütün halqlarınıñ asabalığı olacaqtır», – dep qayd etti prezident.
Putin davet içün teşekkür bildirdi, amma Qırımğa kelecek sene keçirilecek bayramğa kelecekmi, yoq – cevap bermedi.
Bunen beraber, Şirin ayttı ki, «Qırımnıñ Rusiyege qoşulğanı» sebebinden qırımtatarlar içün çoqusı şeyler yahşı tarafqa deñişti. Şirinniñ sözlerine binaen, qırımtatarlarğa qurucılıq içün topraq damartıları ayırıla, daireler berile, neşirler inkişaf ete.
«Qırımtatar halqınıñ adetlerini saqlağan «Yıldız», «Qırım», «Yañı dünya» kibi gazeta ve mecmualar neşir etile (aqiqaten ise, işbu neşirler Qırımda qırımtatarlarnıñ Vatanğa kütleviy şekilde avdeti başlanğanınen derc etile – Avdet). Endi «Millet» milliy telekanalımız bar (birinci qırımtatar telekanalı ATR edi, bu telekanal 2005 senesi teşkil etildi, 2015 senesi ise, yayınlama içün devlet qayd etüvini almadı ve Kiyevge köçti – Avdet)», – dep ilân etti Şirin.
Bundan da ğayrı, o, Putinge reabilitatsiya aqqında fermanı içün teşekkür bildirdi.
«Ağlamamaq içün özüni tutmaq ağır, çünki bunı duymaq kerek», – dep işandırdı Şirin.
Putin ise, «qabul etilgen qararlarnıñ kâğıtta qalmaycağını, bunıñ ömürge keçirilecegini» vade etti.
O qayd etti ki, repressiyalardan zararlanğanlarğa içtimaiy-iqtisadiy destek köstermek içün federal bücetten 10 mlrd ruble ayırıldı.
Teşekkür ve maqtav sözlerinen forumda küreş boyunca olimpik çempionı Rustem Kazakov da forumda iştirak etti.
