Qırımda mahkeme «Sudaqlı dörtniñ işi» boyunca toplaşuvda bütün qabaatlanğanlarnı memuriy uquq bozuvınen qabaatladı. Qabaatlanğan dört kişi 20 biñer ruble para cöremesinen cezalandı.
Bu aqta qırımtatar faali Lenora Dülber bildirdi.
«Sudaqlı dört» – Ablâkim Ablâkimov, Enver Çavuş, Seytmamut Seytumerov ve Alim Muslâdinov memuriy uquq bozuvı yapqanınen qabaatlana. Olardan er biri 20 biñ ruble para cöremesinen cezalana», – dep yazdı Dülber Facebook saifesinde.
Bu sene iyün ayında mahkeme mayıs 18-de qayd etilmegen avtoyürüş içün yaqalanğan dört qırımtatarına qarşı cinaiy işni qapatmağa qarar aldı.
Avgust 29-da Qırım Yuqarı mahkemesi, Rusiye İçki işler nazirliginiñ Sudaq şeeri boyunca bölügi yolbaşçısınıñ vazifesini eda etken Dmitriy Krekovnıñ Sudaq şeer mahkemesiniñ mayıs 18-de şeerde milliy bayraqlarnen keçken dört qırımtatarğa nisbeten cinaiy işni qapatmaq qararına qarşı şikâyet arizasını baqtı.
Avdetniñ bildirgenine köre, bundan evel İslâm-Terek rayon mahkemesi dört qırımtatarnıñ er birine 20-şer mecburiy işler cezasını belgiledi.
