Qırım müftiyatı yarımada musulmanlarını Rusiye Federatsiyasınıñ qıtaiy qısmından kelgen «Elâl» dep yazılğan mahsulatqa muqayt olmağa çağıra, çünki bu mahsulat onıñ üstündeki yazığa uymaması mümkün.
Qırım musulmanları diniy idaresi matbuat hızmetiniñ bildirgenine köre, yarımada müftiyatına musulmanlar tükânlarda içinde domuz eti olğan «Kuban bekonı» şirketiniñ «Halâl» adını taşığan mahsulatı satılğanına şikâyet ile muracaat etti. Bunen beraber, «Halâl» sertifikatı olmağan ve Şeriat bozuvınen yapılğan sucuq, qaşıqaş ve diger mahsulat elâl mahsulatı olaraq satıla.
İşbu mahsulatnıñ diniy teşkilât tarafından berilgen şeadetnamesi yoq, ve onıñ üstünde mahsulat elâl standartlarına uyğanı aqqında bildirgen mahsus işaret (logotip) yoq.
Qırım musulmanları diniy idaresi, işbu mahsulatqa nisbeten kerekli tedbirlerniñ alıp barılması içün, Rosselhoznadzorğa muracaat etti.
«Bunen beraber, Qırım musulmanları diniy idaresi Qırım musulmanlarını diqqatlı olmağa çağıra ve mahsulatnı satın almazdan evel onıñ terkibini ögrenmege, bunen beraber, Qırım musulmanları diniy idaresiniñ logotipi olğanına diqqat etmege tevsiye ete», – dep bildirdiler müftiyatta.
Avdetniñ evel bildirgenine köre, Qırım tükânlarında içinde domuz yüregi olğan qaşıqaş elâl mahsulatı olaraq satıla. Qaşıqaş paketlemesini köstergen fotoresimni bloger ve qırımtatar faali Muhamed-Ali Sulaymanov Facebook saifesinde paylaştı. Yerli musulmanlarnıñ narazılıq bildirgenlerine baqmadan, bazı tükânlarda, em de camige yaqın yerleşken tükânlarda, içinde domuz eti olğan qaşıq aşnı satmağa devam ete.
Elâl qaşıqaşnı yapqan «Kuban bekonı» şirketinde mahsulat içine domuz yüregi kirgeni aqqında yazılğanınıñ hata olğanını ayttılar. O yerde bildirdiler ki, şirkette hatalı yazını qapatacaq stikerlerni azırlaylar.
