Aqmescitte Mahmud Qaşgarlı adına Halqara edebiyat yarışınıñ Qırım basamağınıñ ğalipleri taqdirlendi. Olarnıñ arasında debütçiler de bar – müelliflerniñ bazıları bundan evel öz işlerini oquyıcılarnıñ mahkemesine taqdim etmegen edi.
Yarışta Bağçasaraydaki İ. Gasprinskiy memorial müzeyiniñ müdiri Elmira Abibullayeva, professor, QMPU Qırımtatar tili ve edebiyatı ilmiy-tedqiqiy merkeziniñ yolbaşçısı İsmail Kerimov ve yazıcı Mustafa Ametov ğalebe qazandılar.
«Oquyıcını Qırım hanlığı zamanlarına daldırğanıma baqmadan, ikâyemde şimdiki künde de aktual olğan meseleler açıla», – dep añlattı «40 biñ «Maşalla» ikâyesiniñ müellifi Elmira Abibullayeva.
Umumen olaraq, yarışta yedi iş iştirak etti, bularğa belli qırımtatar yazıcıları qıymet kesti, dep bildire Crimeantatrs.club.
«Men asıl da böyle şey ümüt etmegen edim ki, tap bu qadar pişken, tap bu qadar teren mündericeli, insannı celp etici, oquyıcılarnı özüne celp etici ikâyeler yazabilir bugünki künde yaşlar, doğrusını aytqanda, çoq işanmay edim. Amma Allahqa biñ kere şükürler olsun ki, fikrimiñ yañlış olğanı isbatını kördim» – dep duyğularınen paylaştı yazıcı Uriye Edemova.
Qaşgarlı adına edebiyat yarışı türk memleketlerinde er sene Avrasiya yazıcıları birligi tarafından keçirile. Yarışnıñ Qırım basamağını Nenkecan qadın-qızlar mecmuası teşkil ete. Konkursnıñ halqara basamağı dekabr ayında keçirilecek.
