Noyabr 4 ve 7 künleri Aqmescit merkezinde naqliye areketi sıñırlanacaq

04.11.201613:35

Noyabr 4 ve 7 künleri, bayram yürüşleri munasebetinen, Aqmescit merkezinde naqliye areketi sıñırlanacaq.

Bu aqta Aqmescit memuriyetiniñ matbuat hızmeti bildire.

Memuriyetniñ malümatına binaen, noyabr 4-te saat 10.00-dan Kirov caddesinde Amet-Han Sultan meydanından başlap, Gogol soqağınen çatışmağa qadar areket toqtatılacaq, saat 10.00-dan 15.00-ke qadar Kirov caddesinde Gogol soqağınen çatışmadan Sevastopolskaya soqağınen çatışmağa qadar naqliye areketi toqtatılacaq.

Noyabr 7-de saat 11.40-tan Samokişa ve Sevastopolskaya soqaqlarınıñ çatışmasından Kirov caddesinen çatışmağa qadar, ve caddede – Samokişa soqağınen çatışmadan Sevastopolskaya soqağınen çatışmağa qadar naqliye areketi toqtatılacaq.

Areket, yürüşten soñ yañıdan başlatılacaq.

Memuriyette bildirdiler ki, merasimler keçirilecek vaqıtta cemaat naqliyesi areketi Proletarskaya, Kavkazskaya ve Karaimskaya soqaqlarından keçecek.

Avdetniñ bildirgenine köre, noyabr 4 künü Qırımda ve Rusiye Federatsiyasında, Halq birligi künü qayd etilgeni munasebetinen, raatlıq künü olaraq ilân etildi.

Er sene noyabr 7-de Rusiyede 1917 senesi Oktâbr inqilâbı künü qayd etile.

Фото аватара

Автор: Редакция Avdet

Редакция AVDET