Qırımda bir kün içinde şahsiy evlerde eki büyük yanğın yüz berdi.
Bu aqta noyabr 4-te Fevqulade vaziyetler nazirligi Qırım idaresiniñ matbuat hızmeti bildire.
Noyabr 2-de Sudaq şeer şurasınıñ Qapsihor (Morskoye) köyünde şahsiy ev yandı. Yanğın meydanı tahminen 57 kvadrat metrni teşkil etti. Yanğıncılar ateşni 30 daqqa içinde söndürdi. Ateş bütünley ev damını ve azbardaki hocalıq qurucılıqlarını yoq etti. Yahşı ki, adamlar zararlanmadı.
Matbuat hızmetinde bildirdiler ki, yanğınnıñ sebebi, bozulğan elektrik ağnıñ qullanılması olğandır.
Bundan da ğayrı, Bağçasaray rayonındaki Büyük Qaralez (Krasnıy mak) köyünde şahsiy ev yandı.
«Yanğıncılar vaqia yüz bergen yerge kelgende, evniñ mansard odasını ateş bütünley qaplap aldı, pencerelerden tuman çıqa edi. 30 daqqa içinde ateş söndürildi», – dep qayd ettiler matbuat hızmetinde.
Müessisede qayd ettiler ki, yanğın meydanı 72 kvadrat metrni teşkil etti. Zararlanğanlar yoq. Ekspertler yanğın sebeplerini ögrene.
