Noyabr 4-te ilk sefer Bağçasarayda, «Güzel» etnik merkezinde «Küz mevsimi sebebinden…» edebiyat aqşamı keçirildi.
Merasim yaş qırımtatar müellifleri Mayye Abdulganiyeva (Safet), Aliye Kence-Ali, Seyare Kökçe tarafından teşkil etildi.
Etnik merkezi zallarınıñ birinde müellifler kelgen musafirlerge öz eserlerini, şiir ve nesirlerini taqdim etti. Aqşam, sevgi ve hainlik, ğayıp ağrısı ve qaytuv quvançı, tuvğan topraqqa nisbeten sadıqlıq ve ömür manasını felsefiy qıdıruvı mevzularına bağışlandı.
Qırımtatar teatrı aktrisası Susanna Barabaşeva qırımtatar ve rus tillerinde miniatüralarnı taqdim etti. «Qırım» gazetasınıñ baş muarriri Bekir Mamut tarihiy mevzulı şiiriyet fikirlerinen paylaştı. Qırımtatar bardı Asan Faytoncı musafirlerge öz türkülerini taqdim etti.
Edebiy aqşamğa Bağçasaray, Aqmescit, Aluşta ve Saq rayonından musafirler keldi. Aqşam neticesini çıqarıp, seyirciler, em de iştirakçiler bir fikirge keldi: bugün bu kibi aqşamlarnıñ keçirilmesi kerek ve bu merasimler daa sıq teşkil etilmeli.
Foto: Avdet, Aliye Kence-Ali, Maye Abdulganiyeva