Qırımda suniy suv anbarlarında suv miqdarı pek tez azlaşa, bu ise, yarımada sakinleriniñ suvnen teminlenmesine tesir ete bile.
Bunı tasdıqlağan videonı belli Qırım blogeri Sergey Psaröv paylaştı. Yarımadada suv ile teminlevnen bağlı problemalar yoq olğanı aqqında Qırım ükümetiniñ beyanatlarından soñ, o, suniy suv anbarlarınıñ suvnen toldurılmasını teşkerdi.
Aluştanı ve yanındaki rayonlarnı suvnen teminlegen Körbek (İzobilnoye) suv anbarınıñ yarısı tolu, aynı regiondaki Yuqarı Şuma (Verhnâya Kutuzovka) suv anbarı aman-aman boş tura.
Aqmescitni ve bu rayondaki bir qaç köyni tuzsız suvnen ve hocalıq içün kerekli suvnen teminlegen Ayan suv anbarı aman-aman boş oldı.
«Suv aman-aman yar ucuna yete edi, şimdi suv aman-aman yoq. Bundan da ğayrı, bentte (dambada) körüne ki, evel bu yerde ziyade suv bar edi», – dep haber etti bloger.
Ayan suv anbarına ketken özen ise, onıñ sözlerine köre, aman-aman qurudı.
Esasen Qırım paytahtını suvnen teminlegen Aqmescit suv anbarındaki vaziyet biraz yahşıca.
«Amma biz barıp baqqan suv anbarlarından bu, vaziyet nezaret astında bulunğan yekâne suv anbarı ola, dep aytmaq mümkün», – dep ayta Sergey Psaröv.
Avdetniñ evel bildirgenine köre, Qarasuvbazar rayonındaki Taygan suv anbarından soñki suv alındı. Bunıñ neticesinde, «Taygan» arslan bağçası suvsız qaldı.
Ayan suv anbarını suvnen teminlegen özen
