«Yedinaya Rossiya» Poklonskayağa halq ögünde sözge çıqmaqtan vazgeçmege rica etti

08.11.20169:13

«Yedinaya Rossiya» firqası Rusiye Devlet duması deputatı Natalya Poklonskayağa yaqın vaqıtta er angi media faaliyetten vazgeçmege tevsiye etti.

Bu aqta Znak neşrine Dumada fraktsiya reberiyetine yaqın olğan eki menba bildirdi.

Poklonskayanıñ tek añlamlı olmağan nutqu «Yedinaya Rossiya» firqası azalarını «ğadaplandırdı», dep qayd etti Znak neşriniñ subetdeşlerinden biri.

Siyasetçiniñ «ayrette qaldırıcı areketleri», qaysı birlerine baqıp, adamlar Dumanıñ yañı çağıruvına qıymet kese, parlament reberiyeti ilân etken deputatlarnıñ mütehassıslaştırılması yönelişine ters kele. «Soñki tamçı», Vladimir Leninniñ Adolf Gitler ile qıyaslanmasınen bağlı ikâye oldı, qaysı biri «Yedinaya Rossiya» azalarını böldi.

Avdetniñ bildirgenine köre, Oröl vilâyet şurası deputatı Ruslan Perelıgin Baş prokuraturağa Natalya Poklonskayanıñ Adolf Gitler ve Vladimir Leninni bir sırağa qoyğan sözlerini teşkermek muracaatınen ariza berdi.

Poklonskaya, LiveJournal neşrinde öz blogında «Ükümdar II-ci Nikolay imayege muhtac degil, onı Rabbiniñ Özü tazim etti» serlevalı ilânnı paylaştı. Bu yerde o, Adolf Gitler, Vladimir Lenin, Mao Tszedunnı, olarnı ХХ asırnıñ zalımları dep adlandırıp, bir sırağa qoya.

Devlet duması spikeriniñ muavini Petr Tolstoy qayd etti ki, Poklonskayanıñ beyanatı, ne fraktsiyanıñ noqta-i nazarı, ne de firqanıñ noqta-i nazarı ola, ve er kesni «tınçlanmağa» çağırdı.

Фото аватара

Автор: Редакция Avdet

Редакция AVDET