Çarşenbe künü saba AQŞ prezidenti Barak Obama milliarder Donald Trampnı prezident saylavlarında ğalebe qazanğanınen hayırladı.
Bu aqta Beyaz saray matbuat kâtibi Joşua Ernest bildirdi.
«Prezident bugün saba erte Donald Trampnı ğalebenen hayırlamaq içün oña Beyaz saraydan telefon etti», – dep aytıla beyanatta.
Bundan da ğayrı, ameldeki AQŞ yolbaşçısı sabıq devlet kâtibi Hillari Klintonğa da telefon etip, «onıñ bütün devlette keçirgen küçlü saylavaldı kampaniyasından ayretlengenini bildirdi».
Ernestniñ haber etkenine köre, Obama Trampnı bu cumaaqşamı künü, noyabr 10-da saylanğan prezidentke «ükümniñ keçirilmesi» çerçivesinde Beyaz saraynı ziyaret etmege davet etti.
Bundan da ğayrı, çarşenbe künü Obama keçirilgen saylavlar neticeleri boyunca sözde bulunacaq.
Noyabr 8-de Amerika Qoşma Ştatlarında umumiy saylavlar keçirildi. İlk neticelerge köre, Tramp 270-ten ziyade rey aldı, dep bildire «TASS».
Avdetniñ bildirgenine köre, Hillari Klinton Donald Trampqa telefon etti ve saylavlarda yeñilgenini tanıdı.
