Bütün Dünya Qırımtatar Kongressi Türkiyeden «rusiyeli Qırım» temsilcilerine qarşı sanktsiyalar kirsetilmesini talap etecek ola

12.11.201613:00

Bütün Dünya Qırımtatar Kongressi İcra komitetiniñ azaları Türkiye ükümetine Qırımnıñ Rusiyege qoşulması meselesi boyunca öz resmiy noqta-i nazarına uymaq ve devletke ayrı şahıslarnıñ kirişini sıñırlamaq talabınen muracaat etecek.

Bu aqta ATR telekanalınıñ yayınında qırımtatar faali Nariman Celâl bildirdi.

Onıñ sözlerine binaen, BDQK delegatları Türkiyeden devletni Rusiye adından qırımtatarlarnı temsil etken adamlarnıñ «namussız» ziyaretlerini diqqatlı nezaret etmesini talap etecek.

«Türkiye, Qırımnıñ Rusiye Federatsiyasınıñ bir qısmı olğanını tanımasa, bu ise, şimdiki vaqıtta Türkiye Cumhuriyetiniñ resmiy noqta-i nazarıdır, böyle alda, rusiyeli Qırımnı er angi leyhalarda temsil etmege tırışqanlarğa qarşı kerekli şekilde davransın», – dep qayd etti o.

Bundan da ğayrı, BDQK azaları avropalı memleketler ükümetlerinden ayrı adamlarğa qarşı şahsiy sanktsiyalarnıñ kirsetilmesini soraycaq ola.