Moldovanıñ yañı prezidenti Qırımnıñ de-fakto Rusiye territoriyası olğanını ayttı

15.11.20169:45

Moldovanıñ yañı prezidenti İgor Dodon ayttı ki, de-fakto Qırım Rusiye territoriyası ola.

«Bellesem, bu qararnı alğanda, Pridnestrovyenen bağlı problemalarımız bar olğanını köz ögünde tutmalı. Bunıñ içün bu meselege pek diqqatlı olmalımız ve, Pridnestrovyeni coymamaq içün, nasıldır ciddiy adımlar yapmamalımız. Amma men endi aytqan edim ki, de-fakto Qırım Rusiye territoriyası ola, de-yüre bu, Ğarp tarafından daa tasdıqlanmadı», – dep ayttı Dodon Sputnik France agentligine bergen intervyusında, bildire «RİA-Novosti».

Noyabr 13-te Moldovada prezident saylavlarınıñ ekinci basamağı keçirildi. Merkeziy saylav komissiyasınıñ ilk malümatına binaen, reylerniñ 52,18 faizini alğan Sotsialist firqasınıñ yetekçisi İgor Dodon ğalebe qazandı. Onıñ raqibi  Mayya Sandu reylerniñ 47,82 faizini qazandı.

Bunen beraber, Dodon daa bir qaç ciddiy ilân etti. O ayttı ki, Avropa birligi ile añlaşmanıñ lâğu etilmesi boyunca referendum keçirmege niyetlene. Bunen beraber, Avrasiya iqtisadiy birligi ile işbirlik tutmağa planlaştıra.

Dodonnıñ bildirgenine köre, iqtisadiy köstergiçler, Avropa birligi ile assotsiatsiya aqqında añlaşmanıñ imzalanması hata olğanını köstere.

Author: Редакция Avdet

Avdet gazetası