Rusiye Müşteri aqları saqlav saasında nezaret etüv federal hızmetiniñ (Rospotrebnadzor) Qırım Cumhuriyeti ve Aqyar boyunca regionlarara idaresiniñ inspektorları yarımadağa «Varâg» paromı vastasınen Türkiyeden ketirilgen 49 tonna mandarinniñ yiberilmesini yasaq etti.
Bu aqta müessiseniñ matbuat hızmeti bildire.
«Sanitar-karantin nezareti keçirilmesi çerçivesinde qayd etildi ki, aşayt mahsulatı – Türkiyeden ketirilgen taze mandarinler – «Aşayt mahsulatı havfsızlığı aqqında» Ticariy birliginiñ Tehnikiy reglamentiniñ Yekâne sanitar-epidemiologik ve gigiyenik talaplarına ve Devlet Standartları talaplarına uymay», – dep haber ettiler hızmette.
