Rusiyede eki genç, politsiyağa ateş açqan soñ, özüni öldürdi

15.11.201617:09

Rusiyeniñ Pskov vilâyetinde eki genç politsiyağa ateş açtı ve, politsiya hadimleriniñ bildirgenine köre, özüni öldürdi.

Radio Svobodanıñ haber etkenine binaen, on beş yaşındaki oğlan ve qız Strugi Krasniye köyunde politsiyağa ateş açtı. Bundan soñ, yigit qız dostunı ve ondan soñ özüni de öldurdi.

Denis M. ve Yekaterina V. Strugi Krasniye köyunde şahsiy evde qapatıldı ve içinde silâ olğan seyfni bozıp açtı. Qıznıñ anası, evge kirip olamağanından soñ, politsiyanı çağırdı. Gençler kelgen politsiya hadimlerine ateş açtı. Denis ve Yekaterina ev içinde yürgenlerini ve atışmanı videoğa çıqarğan edi, bu «Periscope» ağında canlı şekilde kösterile edi. Videoda eşitile ki, qız seyircilerge olar Denisnen evden ana-babalarınen qavğalaşqanı içün qaçqanını añlata. Bir qaç sefer bu ibare aytıldı: «Ruslar teslim olunmay».

Politsiya hadimleri evni blok etti ve gençlerden silâ almağa tırıştı. Er şey facianen bitti: Denis qız dostunı ve özüni öldürdi.

Radio Svoboda mühbiriniñ malümatına binaen, vaqia yüz bergen evde kimse yaşamağan. Evniñ saibi, iş adamı ve sabıq arbiy adam bir yıl evel vefat etti. Mirasçılar evni yazlıq evi olaraq qullana edi. Yekaterina V., olarnıñ biriniñ ögey qızı edi.

Gençlerniñ ekisi de Pskovda yaşadı ve 9-cı sınıfta oqudı. Üç kün evel olar ana-babalarından qaçtı. Ölümden evel gençler içtimaiy ağlarda yaqınları içün beyanatlar qaldırdı, qoranta ve tanışlarınen sağlıqlaştı. Eki yaşnıñ yapqan işiniñ sebepleri daa belli degil.

Фото аватара

Автор: Редакция Avdet

Редакция AVDET