Qırım ve Sevastopol musulmanları diniy idaresi, Kiyevde Qırım müftisi saylanılmasınıñ «absurd ve nevbetteki provokatsiya olğanını» saya.
Böyle beyanat teşkilâtnıñ resmiy saytında yerleştirilgen.
«İşbu areketler, qırımtatar halqınıñ ve bütün Qırım musulmanlarınıñ menfaatlarına nisbeten ürmetsizliktir. Tek Vatanda olğan halqnıñ müftini saylamaq aqqı bar… Bu, qırımtatar halqınıñ diniy duyğularınen namussız bir oyundır», – dep bildirile beyanatta.
Qırım müftiyatında qayd ettiler ki, hacı Emirali Ablayev, Qırım musulmanlarınıñ yekâne qanun boyunca saylanğan müftisi ola.
Noyabr 20-de Kiyevde Herson, Kiyev, Lvov ve Vinnitsadan kelgen 14 qırımtatar teşkilâtınıñ temsilcileriniñ qurultayı çerçivesinde Qırım musulmanları diniy idaresi teşkil etildi. İşbu organnıñ yolbaşçısı vazifesine Ayder Rustamov saylandı.
Foto: Avdet
