Kiyevde Qırım müftisi saylandı

21.11.20169:35

Kiyevde Qırım musulmanları diniy idaresi yolbaşçısı Ayder Rustamov oldı

Noyabr 20-de Kiyevde Herson, Kiyev, Lvov ve Vinnitsadan kelgen 14 qırımtatar teşkilâtınıñ temsilcileriniñ qurultayı çerçivesinde Qırım musulmanları diniy idaresi teşkil etildi.

Merasimde iştirakçiler yekâne musulman merkeziniñ, yani Musulman diniy idaresiniñ teşkil etilmesine qol tuttı. İşbu organnıñ yolbaşçısı vazifesine Ayder Rustamov saylandı.

Bundan da ğayrı, ukrain Ulemler şurası, yani yuqarı diniy toplaşuv, müftiyatnıñ teftiş ve nezaret etüv organı teşkil etildi.

«Şurağa 11 adam kirdi: 9 insan – musulman diniy tasili olğan adamlardır. Bundan da ğayrı, Şurağa daa eki adam kirecek – Meclis azalarından ya da qırımtatar milliy areketi veteranlarından kimseler. Şura yolbaşçısı vazifesine Suleyman Hayrulayev saylandı», – dep bildire ATR telekanalı.

«Qırım ve Sevastopol musulmanları diniy idaresi» Merkeziy diniy teşkilâtında ise, buña cevap olaraq, qayd ettiler ki, Qırım musulmanlarınıñ yekâne qanun boyunca saylanğan müftisi hacı Emirali Ablayev ola.

«Qırım müftisi, beş yılda bir kere toplaşqan Qırım musulmanları Qurultayında saylanıla. Qırım musulmanları, müftiyat ve müftiniñ faaliyetinen bağlı meselelerini Qırım musulmanları diniy idaresiniñ Yuqarı Şurası baqa ve bular boyunca qararlar ala.

Demek ki, Qırım tışında bulunğan ve yarımadanıñ diniy ayatınen iç alâqalı olmağan er angi şahısnıñ müfti vazifesine «saylanması», Qırım musulmanları Qurultayı qaideleriniñ bozulması sayılır», – dep bildirdiler Qırım musulmanları diniy idaresinde.

Bundan da ğayrı, Müftiyat, bu areketlerniñ qırımtatar halqınıñ ve bütün Qırım musulmanlarınıñ menfaatlarına nisbeten ürmetsizlik olğanını saya.

«Tek Vatanda olğan halqnıñ müftini saylamaq aqqı bar», – dep qayd ettiler QMDİ-de.

Qırım musulmanları diniy idaresi ilân etti ki, Kiyevde «Qırım müftisi saylanılmasınıñ» absurd ve qanun boyunca saylanğan müfti hacı Emirali Ablayevge, Qırım müftiyatına ve yarımada musulmanlarına qarşı yapılğan nevbetteki provokatsiya olğanını saya.

Müftiyatta vatandaşlarnı bu kibi provokatsiyalarğa diqqat etmemege, diniy adetlerni ürmet etmege, Vatanda barışıq içinde yaşamağa çağırdılar.

Фото аватара

Автор: Редакция Avdet

Редакция AVDET