Kefede üç künge suv berilmesi toqtatılacaq

22.11.201614:25

Kelecek afta Kefede (Feodosiya) üç kün devamında suv berilmeycek.

«Qırım suvu» Qırım Cumhuriyeti Baş idaresiniñ Kefe bölügi müdiri Andrey Çimpoeşniñ malümatına binaen, noyabr 29-dan dekabr 1-ge qadar tamir işleri alıp barılacaq.

«Şeer suv temizleyici aletlerinde temiz suv rezervuarı bağlanılacaq», – dep ayttı Çimpoeş.

Bunen beraber Çimpoeş qayd etti ki, bugünki künde şeer içilecek suv yedeklerini Şimaliy-Qırım kanalından, Keriçke suv bergen dükerden toldura.

Şimdiki vaqıtta Kefe anbarında olğan suv 30 künge yetecek, bu suvnıñ eñ  minimal şekilde qullanılması içün elinden kelgeni yapıla.

Avdetniñ evel bildirgenine köre, Qırımda suniy suv anbarlarında suv azlaşa, bu ise kelecekte yarımada sakinleriniñ suvnen teminlenmesi meselesini şübeli yapa.