Qırımtatar oğlanı rus tili olimpiadasında ğalebe qazandı

22.11.201613:45

Aqmescit mekteplerinden biriniñ 3-ci sınıf talebesi Eskender rus tili ve edebiyatı olimpiadasınıñ şeer basamağında birinci yer aldı.

Bu aqta Facebook saifesinde onıñ anası yazdı.

«Qırımtatar kişi rus tili boyunca şeer olimpiadasında 1-ci yer alsa, ne de acayıp», – dep yazdı o.

Avdetke oğlannıñ anası añlatqanına köre, Eskender başta rus tili ve edebiyatı boyunca mektep olimpiadasında ğalebe qazandı. Keçken bazar künü şeer basamağı teşkil etildi, olimpiada 3 sanlı mektep-gimnaziyasında keçirildi.

Keçken sene de Eskender rus tili ve edebiyatı boyunca şeer olimpiadasında iştirak etken edi, amma o sefer üçünci yer almaq içün onıñ bir baası yetmedi.

Bundan da ğayrı, oğlan ilmiy konferentsiyalarda iştirak ete. 2015 senesi o, cumhuriyet seviyesinde «Salğır ve onıñ ekologik meseleleri» işinen ğalebe qazandı. 2016 senesi onıñ «Qırımda pamuq östürmesi» işi Obninsk şeerine bütün Rusiye basamağına alıp barılğan edi, o yerde ekinci yer aldı.

Author: Редакция Avdet

Avdet gazetası