Cuma künü, noyabr 25-te belli qırımtatar dissidenti ve uquq qoruyıcısı Mustafa Cemilevniñ oğlu Hayserniñ Astrahan şeerindeki 10-ci koloniyadan (apishaneden) azat etilmesi beklenile.
Onı o yerden almaq içün, Astrahan şeerine onıñ apayı ve anası kelecek.
Bu aqta noyabr 22-de adliyeci Nikolay Polozov QHA agentligine bildirdi.
Polozovnıñ bildirgenine köre, Hayser Cemilevni almaq içün koloniyağa, Cemilevniñ qorantası onı azat etilgen soñ Kiyevge ketirmege niyetlengeninen bağlı telükeni minimal seviyege keçirmek içün, ukrain diplomatları kelecek, dep bildire «Qırım.Aqiqat».
Hayser Cemilev, 2013 senesi mayıs ayında Bağçasaraydaki evinde babasınıñ tüfeginden qoranta tanışı Fevzi Edemovnı öldürgeninde qabaatlanğan edi.
Astrahan Sovetskoye rayon mahkemesi üç yıl memuriy nezaretni belgiledi. Alınğan qarar boyunca, Hayser Cemilevge Qırımdan çıqmaq, Bağçasarayda yaşağan evinden, çalışmağan taqdirde, aqşam saat 22-den saba 6-ğa qadar bir de bir yerge ketmek, qavehane, restoranlarda ya da diger içkicilik olğan yerlerde bulunmaq yasaq etilgen.
Hayser Cemilev ayda eki kere «yaşağan ya da qayd etüvden keçken yerindeki içki işler idaresine» barmaq mecbur.
