ATR telekanalınıñ saibi, Bütün Dünya Qırımtatar Kongressiniñ reis muavini Lenur İslâmov Qırım müftisiniñ muavini Ayder İsmailov ile canlı yayında laf etti.
Noyabr 22-de o, «Millet» telekanalınıñ yayınına telefon etti, o yerde musafir olaraq İsmailov bulunğan. Programma devamında Kiyevde Qırım müftiyatı teşkil etilmesi meselesi muzakere etilgen.
«Allo, selâm aleyküm. Bu sizge Lenur İslâmov telefon ete. Tanıdıñızmı meni? Ayder efendi, meni hatırlaysızmı?» – dep soradı lafnıñ başında İslâmov.
Müsbet cevabını alğan soñ, o İsmailovğa sual berdi: «Siz, biz qaytqanda ne iş yapacaqsıñız? Qaysı yerde olacaqsıñız?»
«Bu insanlar nasıl yüznen mında qaytacaqlar, başta buña bir cevap bersinler, bundan soñ biz qalğanını laf etermiz. Bu birinciden. Ekinciden, biz vatandamız, ve kim de kelse, bizni mında tapar. «Selâm aleyküm», dep kelse, «Ve aleyküm selâm» cevabını tapar. Başqa türlü kelse, özüne lâyıq olğan bir şekilde cevabını alır. Ve bizim içimizde iç bir vaqıt qorqu yoq edi, ve qorqu olmaz, qorqu daima vatandan tış olğan insanlardadır, ve biz bunı körmektemiz. Şunı añlamaq kerek ki, vatannıñ tışına ketken bütün insanlar içün biz qasevetlenemiz. Ve esasında, olarnıñ qaytıp kelmesi, bizim arzu ve istegimizdir. Qırım musulmanları müftisi acı Emirali Ablayev efendi de bir qaç kere «Ketkenler qaytıp kelsinler» dep, çağrıda bulunğandır», – dep cevap berdi Qırım müftisiniñ muavini, dep bildire «15 minut» saytı.
Avdetniñ bildirgenine köre, noyabr 20-de Kiyevde Herson, Kiyev, Lvov ve Vinnitsadan kelgen 14 qırımtatar teşkilâtınıñ temsilcileriniñ qurultayı çerçivesinde Qırım musulmanları diniy idaresi teşkil etildi. İşbu organnıñ yolbaşçısı vazifesine Ayder Rustamov saylandı.
