Aqmescitte Kantar soqağı, 3 adresi boyunca yerleşken çoq daireli ev quruvı yekünlengen soñ, 90 qoranta yañı evlernen teminlenecek.
Bu aqta Milletlerara munasebetler ve sürgün etilgen vatandaşlar meseleleri boyunca Devlet komitetiniñ reisi Zaur Smirnov bildirdi.
Smirnovnıñ malümatına binaen, Aqmescitte Qırımnıñ aqlanğan (reabilitatsiyadan keçken) halqları temsilcileri olğan 90 qorantağa Bor Çoqraq (Fontanı) qasabasında yerleşken evde yañı daireler berilecek.
«Dekabr 10-da, İnsan aqları künü, Aqmescitte, 20 yıldan ziyade ev almaq içün nevbette turğan Qırım Cumhuriyetiniñ aqlanğan vatandaşlarından olğan qorantalarğa yañı dairelerniñ anahtarları tantanalı şekilde taqdim etilecek», – dep bildire Zaur Smirnovnıñ sözlerini Devlet komitetiniñ matbuat hızmeti.
Bundan evel bildirilgenine köre, Qırımdan sürgün etilgen halqlarnıñ aqlanması aqqında Fermannıñ ömürge keçirilmesi içün federal bücetten 10 milliard ruble ayırıldı.
Foto: Gulnara Abdulayeva
