Özüni tatar saymaq içün, insan tatar tilini bilmek mecbur degil.
Bunı Tataristan medeniyet naziriniñ muavini Güzel Şaripova ayttı.
«Alimlerimiz (Ş. Marcani adına tarih institutınıñ hadimleri – Avdet) ayta ki, milliy hususiyet, hususan tatarnıñ milliy hususiyeti til bilgisine esaslanmay. Yani, tilni bilmek kerek degil. Bugün tatar kişi, tatar tilinde laf etmese de, olur. Böyle ise, onıñ tatarlığı neden ibarettir? Alimlerimiz ayta ki, bugün tatarlar öz tatarlığını tamırlarından duya. Men – tatarım, ana-babam – tatar, balalarım – tatardır. Olar, qadimiy tatar topraqlarda yaşay edi», – dedi Şaripova.
2010 senesi yapılğan bütün Rusiye ealiniñ qayd etilüvi malümatına binaen, tatar tilinde laf etken rusiyelilerniñ sayısı 4,28 million insan edi. 2002 senesi böyle insanlarnıñ sayısı 5,34 million edi. 8 yıl içinde Rusiyede tatar tilini bilgen adamlarnıñ sayısı bir millionğa eksildi. Aynı bu vaqıt içinde tatarlarnıñ sayısı da 240 biñge eksildi, dep bildire Idel.Realii.
