Aqmescitte (Simferopol) Rusiye tarihı populârlaştırılması aktsiyası çerçivesinde qırımtatar eskadronı resimi kösterilgen sitilayt peyda oldı, levha müellifleri onı kazak eskadronı dep adlandırdı.
Böyle hata ya da mahsus yapılğan tarihiy kerçekniñ deñiştirilmesine Qırım sanatşınası Mamut Çurlu diqqat etti. O, sitilayt fotoresimini Facebook saifesinde paylaştı ve onıñ qısqa tarihını ikâye etti. Onıñ fikrince, Qırımda «qırımtatarlarnıñ tarihını hırsızlaylar».
Qırımtatar eskadronı 1827 senesi arbiy hususiyetlerinen ayırılğan qırımtatarlardan teşkil etildi.
Eskadron, Kazak polku leyb-gvardiyasına qoşuldı.
1828—1829 seneleri Rusiye-Türkiye cenki vaqtında eskadron Kazak polku leyb-gvardiyası terkibinde Varna qalesi muasarasında iştirak etken edi.
1854—1855 ss. Şarqiy cenk vaqtında eskadron Baltika deñizi yalısında sıñırda hızmet etti.
1863 senesi mayıs 26-da eskadron lâğu etildi, onıñ yerine ise Onıñ Azretleri Şahsiy konvoyı terkibinde Qırımtatarlar leyb-gvardiyasınıñ olması kerek olğanı aqqında emir berildi. 1890 senesi taqım dağıtıldı.
